Որոնել կայքում

Որոնեք հրապարակումներ, իրավական գործեր, ծրագրեր և նորություններ։

Նորություններ

Մարաքեշի պայմանագրին միանալու մասին փաստաթուղթը մինչ օրս ի պահ չի հանձնվել

Մարաքեշի պայմանագրին միանալու մասին փաստաթուղթը մինչ օրս ի պահ չի հանձնվել

Հայաստանը մեկ տարի առաջ վավերացրեց «Կույրերի, տեսողությունից հաշմանդամություն ունեցող կամ ընթերցողության ֆունկցիայի այլ դժվարություններ ունեցող անձանց համար հրատարակված ստեղծագործությունների մատչելիությունը դյուրացնելու մասին» Մարաքեշի պայմանագիրը:

Պայմանագիրը երկու հիմնական պարտավորություն է սահմանում պետությունների համար։

Առաջինը հեղինակային իրավունքի նկատմամբ սահմանափակումներ և բացառումներ նախատեսելն է։ Առանց հեղինակային իրավունքի իրավատիրոջ համաձայնության համապատասխան կառույցներին թույլատրվում է մշակել ստեղծագործության մատչելի տարբերակը և դրանք տրամադրել հաշմանդամություն ունեցող անձանց։ Օրինակ՝ թույլատրելի է առանց հեղինակի համաձայնության տպագրել գրքի բրայլյան տարբերակը և տրամադրել հաշմանդամություն ունեցող անձանց։ 

Երկրորդ պարտավորությունն այն է, որ պետք է թույլատրվի մատչելի ձևաչափերով ստեղծագործությունների միջսահմանային փոխանակումը։ Օրինակ՝ եթե հայերեն տպագիր գիրքը մատչելի է դարձել աուդիո տարբերակով, ապա դրանք կարելի է ուղարկել Մարաքեշի պայմանագիրը վավերացրած երկրի հաշմանդամություն ունեցող հայախոս անձանց՝ չխախտելով հեղինակի իրավունքները։ 

Թեև այս կարևոր պայմանագիրը վավերացվել է Ազգային ժողովի կողմից 2020 թվականին, ՀՀ արտաքին գործերի նախարարությունը չի արել վերջին գործողությունը։ Պայմանագրին միանալու մասին փաստաթուղթը մեկ տարի անց դեռ ի պահ չի հանձնվել Մտավոր սեփականության համաշխարհային կազմակերպության գլխավոր տնօրենին։ 

Այս փաստը մեզ հաստատել է և՛ ՄՍՀԿ-ն, և՛ ՀՀ արտաքին գործերի նախարարությունը։ Ըստ նախարարության՝ Պայմանագիրն ավանդապահին ի պահ չի հանձնվել, քանի որ պայմանագրի վերաբերյալ հայտարարության տեքստը գտնվում է քննարկման փուլում։

Գործընթացն ավարտին հասցնելու համար հրավիրում ենք համապատասխան մարմինների ուշադրությունը և ակնկալում նրանց արագ արձագանքը։

 

Կարդալ պայմանագիրը Տեսնել ԱԳՆ պատասխանը

 

 

 


Հետևեք մեր նորություններին

Բաժանորդագրվեք՝ նոր հրապարակումները էլեկտրոնային փոստով ստանալու համար։