«Հաշմանդամություն ունեցող անձանց իրավունքների օրակարգ» հասարակական կազմակերպությունը փնտրում է մոնիթորինգի և գնահատման ծառայություններ մատուցողի՝ նպաստելու հաշմանդամություն ունեցող անձանց իրավունքների պաշտպանության համակարգի հաշվետվողականությանը և արդյունավետությանը։
Փորձագիտական ծառայության նպատակը
Գնահատել Հաշմանդամություն ունեցող անձանց սոցիալական ներառման 2017-2021 թթ. համալիր ծրագրի իրականացումը և վերլուծության հիման վրա ներկայացնել համալիր ծրագրի իրականացման բարելավման առաջարկություններ
Աշխատանքի ծավալը
Ծառայություններ մատուցողի հիմնական պարտականություններն են՝
- Մշակել Հաշմանդամություն ունեցող անձանց սոցիալական ներառման 2017-2021 թթ. համալիր ծրագրի իրականացման գնահատման մեթոդաբանությունը,
- Մշակել տվյալների հավաքման գործիքը, իրականացնել տվյալների հավաքագրումը (համակարգել աշխատանքները),
- Ուսումնասիրել ոլորտը կարգավորող հիմնական իրավական ակտերը,
- Վերլուծել հավաքագրված տեղեկությունները և ամփոփել դրանք զեկույցում,
- Անցկացնել խորհրդակցություններ և քննարկումներ,
- Մշակել 2022-2026 թթ. համալիր ծրագրի և Զինվորական ծառայության ժամանակ հաշմանդամություն ձեռք բերած անձանց իրավունքների պաշտպանության և սոցիալական ներառման միջոցառումների 2021-2023 թթ. ծրագրի իրականացման ընթացիկ մոնիթորինգի և գնահատման պլանը և տվյալների հավաքման գործիքը,
- Իրականացնել գնահատման զեկույցի համար անհրաժեշտ այլ աշխատանքներ,
- Աջակցել կազմակերպությանը մոնիթորինգի և գնահատման կարողությունների ինստիտուցիոնալ զարգացման նպատակով։
Ակնկալվող արդյունքները
- Զեկույց 2017-2021 թթ. համալիր ծրագրի իրականացման գնահատման վերաբերյալ
- 2022-2026 թթ. համալիր ծրագրի և Զինվորական ծառայության ժամանակ հաշմանդամություն ձեռք բերած անձանց իրավունքների պաշտպանության և սոցիալական ներառման միջոցառումների 2021-2023 թթ. ծրագրի ընթացիկ մոնիթորինգի և գնահատման պլան և տվյալների հավաքման գործիք
Պահանջվող որակավորում
- Սոցիոլոգիայի, հանրային կառավարման, իրավագիտության կամ հարակից ոլորտների բարձրագույն կրթություն
- 3-5 տարվա աշխատանքային փորձ հանրային քաղաքականության կամ մարդու իրավունքների ոլորտներում
- Հանրային քաղաքականության ուսումնասիրությունների, մեթոդաբանության, պլանների և գործիքների մշակման փորձ
- Հաշմանդամություն ունեցող անձանց իրավունքներին առնչվող օրենդրական դաշտի իմացություն
- Պետական կառավարման համակարգի մարմինների հետ աշխատելու փորձ
- Գրական հայերենի (գերազանց) և անգլերենի իմացություն
Ժամկետները և այլ մանրամասները
Ծառայության ընդհանուր տևողությունը` 6 ամիս: Աշխատանքները պետք է սկսել 2021 թ. հուլիսի 15-ից:
Ծառայությունների մատուցման առավելություններից է աշխատանքի հեռավար և ճկուն աշխատանքային գրաֆիկով լինելը, պետական կառավարման համակարգի մարմինների և հաշմանդամություն ունեցող անձանց կազմակերպությունների հետ աշխատանքային հարաբերությունների ձևավորման հնարավորությունը։
Խրախուսվում է հաշմանդամություն ունեցող փորձագետների մասնակցությունը։
Դիմելու ընթացակարգը
Հետաքրքրված անձինք պետք է ներկայացնեն հետևյալ փաստաթղթերը (հայերեն կամ անգլերեն)՝
- Ինքնակենսագրական (CV),
- Հետաքրքրության նամակ՝ ընդգծելով համապատասխան փորձը (առավելագույնը 1 էջ),
- Ծառայությունների գնային առաջարկ (ըստ ձևի),
- Իրականացրած համանման ուսումնասիրությունների հղումներ։
Խնդրում ենք վերը նշված փաստաթղթերը մինչև 2021 թ. հուլիսի 12-ը (ներառյալ) ուղարկել էլեկտրոնային փոստով info@dra.am հասցեին՝ նամակի թեմայի տողում նշելով «M&E Services 01»: Հարցերի դեպքում կարող եք գրել նշված էլ. փոստին, կազմակերպության ֆեյսբուքյան էջին կամ զանգել (+374 77) 400 350 հեռախոսահամարին։
Ծրագրի մասին
Ծառայությունն անհրաժեշտ է «Հաշմանդամություն ունեցող անձանց իրավունքների օրակարգ» հասարակական կազմակերպության կողմից իրականացվող «Արդյունավետ և լիարժեք մասնակցություն քաղաքականության մշակմանը և մոնիթորինգին» ծրագրի իրականացման համար։ Ծրագրի նպատակն է աջակցել հաշմանդամություն ունեցող անձանց իրավունքների ապահովմանը՝ Հաշմանդամություն ունեցող անձանց սոցիալական ներառման համալիր ծրագրի մասնակցային մշակման և իրականացման մոնիթորինգի և գնահատման միջոցով։
Ծրագիրն իրականացվում է Եվրասիա համագործակցություն հիմնադրամի կողմից Շվեդիայի միջազգային զարգացման գործակալության, Սիդայի աջակցությամբ իրականացվող «Աջակցություն քաղաքացիական հասարակությանը՝ հանուն բարեփոխումների վրա ներգործության» ծրագրի շրջանակում։
Կազմակերպության մասին
«Հաշմանդամություն ունեցող անձանց իրավունքների օրակարգ»-ը նորաստեղծ հասարակական կազմակերպություն է, որի նպատակն է խթանել, պաշտպանել և մշտադիտարկել Հաշմանդամություն ունեցող անձանց իրավունքների մասին ՄԱԿ-ի կոնվենցիայի արդյունավետ և լիարժեք իրականացումը Հայաստանում։