Հաշմանդամության եվրոպական ֆորումը մտահոգիչ տեղեկություններ է ստացել Լեռնային Ղարաբաղի ճգնաժամից տուժած հաշմանդամություն ունեցող անձանց պաշտպանության և անվտանգության վերաբերյալ։
Այդ առիթով երեկ՝ հոկտեմբերի 17-ին, կազմակերպությունը բաց նամակով դիմել է միջազգային հանրությանը (Միավորված ազգերի կազմակերպության Փախստականների հարցերով գերագույն հանձնակատարին և Եվրոպական միությանը) և Հայաստանի և Ադրբեջանի կառավարություններին։
Հաշմանդամության եվրոպական ֆորումը կոչ է արել բոլոր դերակատարներին ապահովել Լեռնային Ղարաբաղի ճգնաժամից տուժած հաշմանդամություն ունեցող անձանց պաշտպանությունն ու անվտանգությունը, այդ թվում՝ հարգել.
- Հաշմանդամություն ունեցող անձանց իրավունքների մասին ՄԱԿ-ի կոնվենցիայով, մասնավորապես՝ ռիսկային իրավիճակների և արտակարգ հումանիտար իրավիճակների վերաբերյալ 11-րդ հոդվածով նախատեսված իրենց պարտավորությունները,
- Հակամարտությունների ժամանակ հաշմանդամություն ունեցող անձանց պաշտպանության մասին ՄԱԿ-ի Անվտանգության խորհրդի 2475 (2019) բանաձևը,
- Միջազգային մարդասիրական իրավունքը, փախստականների միջազգային իրավունքը և մարդասիրական սկզբունքները:
Մեկնաբանելով իրավիճակը՝ Հաշմանդամության եվրոպական ֆորումի նախագահ Յանիս Վարդակաստանիսն ասել է. «Հաշմանդամություն ունեցող անձինք, որոնք Լեռնային Ղարաբաղում են կամ փախչել են Լեռնային Ղարաբաղից, լքվելու, բռնության և նույնիսկ մահվան մեծ վտանգի տակ են: Նրանք չեն կարող անտեսվել, և այդ պատճառով մենք կոչ ենք անում կառավարություններին և օգնություն ցուցաբերող գործակալություններին կատարել իրենց պարտականությունները և ապահովել, որ հաշմանդամություն ունեցող անձինք լիարժեք պաշտպանված լինեն, ստանան աջակցություն և ներգրավվեն որոշումների կայացման բոլոր գործընթացներում»։
Բաց նամակի ամբողջական տարբերակը կարող եք գտնել այստեղ՝
Բաց նամակը հասանելի է Հաշմանդամության եվրոպական ֆորումի կայքում։ Նամակն այլ՝ մատչելի ձևաչափերով ստանալու համար խնդրում ենք կապ հաստատել info@dra.am էլ. փոստի հասցեով։
-
Հաշմանդամության եվրոպական ֆորումը հաշմանդամություն ունեցող անձանց կազմակերպությունների հովանոցային կազմակերպություն է։ Այն 1996 թվականից ջատագովություն է իրականացում եվրոպական տարբեր կառույցներում, այդ թվում՝ Եվրոպական խորհրդարանը, Եվրոպական հանձնաժողովը և ԵՄ խորհուրդը։ Կազմակերպությանը Հայաստանի Հանրապետությունից անդամակցում է «Հաշմանդամություն ունեցող անձանց իրավունքների օրակարգ» ՀԿ-ն։